Enheduanna Publishing
  • Home
  • Books
  • Journals
  • Editorial Board
  • Sarqaya
  • Store
  • News
  • ܫܸܬ̣ܝܹ̈ܐ ܘܕܘܼ̈ܠܹܐ
  • Authors
  • Contact Us

ܙܩܘܿܪܵܐ ܩܲܕ݂ܡܵܝܵܐ

4/13/2016

0 Comments

 

ܫܸܬ̣ܝܹ̈ܐ ܘܕܘܼ̈ܠܹܐ


ܙܩܘܿܪܵܐ ܩܲܕ݂ܡܵܝܵܐ



Picture

Picture

ܢܝܼܢܸܒ ܠܵܡܲܣܘܼ: ܪܹܫ ܡܲܨܚܵܢܹ̈ܐ ܕܫܸܬ̣ܝܹ̈ܐ ܘܕܘܼ̈ܠܹܐ

​ܫܸܬ̣ܝܹ̈ܐ ܘܕܘܼ̈ܠܹܐ 1 ܚܕ݂ܵܐ ܡܓܲܠܬ̣ܵܐ ܢܵܘܠܵܝܬܵܐ 2 ܚܲܕܬ̣ܬܵܐ ܝܠܵܗ݁ ܕܦܵܪܹܣ ܠܵܗ݁ ܒܹܝܬ̣ ܦܪܵܣܵܐ ܕܐܸܢܚܹܝܕܘܼܐܲܢܵܐ. ܘܗܵܕܹܐ ܡܓܲܠܬ̣ܵܐ ܒܸܕ ܗܵܘܝܵܐ ܬܚܘܿܬ̣ ܡܲܨܚܵܢܘܼܬ̣ܵܐ 3 ܟܠܵܢܵܝܬܵܐ ܕܢܝܼܢܸܒ ܠܵܡܲܣܘܼ، ܗ݁ܘ ܕܐܝܼܬ̣ ܠܹܗ ܦܣܵܣܵܐ ܕܛܵܠܹܒ ܥܘܼܕ݂ܪܵܢܵܐ ܡ̣ܢ ܡܢܲܨܚܵܢܹ̈ܐ ܐ݇ܚܪܹ̈ܢܹܐ ܐܝܼܡܵܢ ܘܟܲܕ݂ ܕܛܵܠܒܵܐ ܣܢܝܼܩܘܼܬ̣ܵܐ. ܔ

​ܫܸܬ̣ܝܹ̈ܐ ܘܕܘܼܠܹ̈ܐ ܚܕ݂ܵܐ ܡܓܲܠܬ̣ܵܐ ܦܬ̣ܝܼܟܲܬ̣ ܐܲܡܢܹ̈ܐ ܫܲܦܝܼܪܹ̈ܐ ܝܠܵܗ݁ 4، ܐܵܘܟܹܝܬ̣ ܚܵܒ̣ܫܵܐ ܠܟܠܲܝܗܝ  ܐܲܡܢܹ̈ܐ ܘܒܲܚܕ݂ܵܐ ܐܘܼܪܚܵܐ ܕܝܼܠܵܢܵܝܬܵܐ.  ܦܬ̣ܝܼܟܲܬ̣ ܐܲܡܢܹ̈ܐ ܝܠܵܗ̇ ܒܗ̇ܝ ܕܚܲܕ݂ ܡܵܚܘܿܪܵܐ ܒܸܕ ܠܵܚܹܫ 5 ܠܡܲܚܪܹܗ ܒܢܵܬ̣ܵܐ ܕܚܲܕ݂ ܪܵܫܘܿܡܵܐ ܘܗ̇ܘ ܪܵܫܘܿܡܵܐ ܒܸܕ ܪܵܫܹܡ ܠܹܗ ܡܲܚܪܵܐ ܕܲܫܡܝܼܥ ܠܹܗ ܥܲܠ ܚܕ݂ܵܐ ܠܘܼܚܵܐ. ܚܲܪܬ̣ܵܐ ܗ̇ܘ ܪܵܫܘܿܡܵܐ ܒܸܕ ܡܲܚܘܹܐ ܠܵܗ̇ ܠܘܼܚܵܐ ܕܲܪܫܝܼܡܵܐ ܠܹܗ ܠܚܲܕ݂ ܡܢܲܩܫܵܢܵܐ 6 ܘܗ̇ܘ ܡܢܲܩܫܵܢܵܐ ܒܸܕ ܢܵܩܹܫ ܚܲܕ݂ ܡܸܢܕܝܼ ܒܘܼܕ ܗ̇ܝ ܠܘܼܚܵܐ (ܕܠܵܐ ܫܡܵܥܬܵܐ ܐܵܘ ܩܪܵܝܬܵܐ ܕܗ݁ܘ ܡܲܚܪܵܐ ܩܲܕ݂ܡܵܝܵܐ). ܘܗܵܕܟ̣ܵܐ ܟܠ ܚܲܕ݂ ܐܲܡܢܵܪܵܐ 7 ܒܸܕ ܠܵܚܹܫ ܠܐܲܡܢܹܗ ܒܢܵܬ̣ܵܐ ܕܚܲܒ̣ܪܹܗ ܐܵܘ  ܡܵܘܬܸܒ̣ ܠܠܘܼܚܹܗ ܩܕ݂ܵܡ  ܚܵܘܪܵܐ 8 ܕܚܲܒ̣ܪܹܗ ܕܒܵܪܘܿܝܘܼܬ̣ܵܐ 9 ܕܣܵܦܪܹ̈ܐ ܘܐܲܡܢܵܪܹ̈ܐ ܡܵܙܓ̣ܵܐ 10 ܒܲܚܕܵܕܹ̈ܐ ܒܗ݁ܝ ܟܲܕ݂ ܗ݁ܝ ܐܘܼܪܚܵܐ ܕܙܵܩܹܪ ܚܲܘܵܟܵܐ 11 ܠܫܸܬ̣ܝܹ̈ܗ ܘܕܘܼܠܹ̈ܗ ܒܢܵܘܠܵܐ 12 ܘܝܵܗܹܒ̣ ܠܲܢ ܚܕ݂ ܙܩܘܿܪܵܐ ܡܠܲܚܡܵܐ. ܓܔ
ܔ 
ܒܐܵܗܵܐ ܙܩܘܿܪܵܐ ܩܲܕ݂ܡܵܝܵܐ ܕܫܸܬ̣ܝܹ̈ܐ ܘܕܘܼܠܹ̈ܐ، ܢܝܼܢܸܒ ܠܵܡܲܣܘܼ ܟܬ̣ܝܼܒ̣ ܠܹܗ ܚܕ݂ܵܐ ܡܫܘܼܚܬ̣ܵܐ ܘܩܸܪܝܵܐ ܠܹܗ ܩܵܐ ܡܝܼܠܵܕ ܝܘܿܚܲܢܵܢ (ܕܪܹܐ ܠܹܗ ܠܫܸܬ̣ܝܹܗ ܒܢܵܘܠܵܐ) ܘܡ̣ܢ ܒܵܬܲܪ ܩܪܵܝܬܵܐ ܕܲܡܫܘܼܚܬ̣ܵܐ، ܡܝܼܠܵܕ ܪܫܝܼܡ ܠܹܗ ܚܕ݂ܵܐ ܠܘܼܚܵܐ (ܡܘܿܥܒܸܪ ܠܹܗ ܠܕܘܼܠܹܗ ܒܫܸܬ̣ܝܵܐ ܩܲܕ݂ܡܵܝܵܐ) ܘܡܘܿܚܸܙܝܵܐ ܠܹܗ ܠܡܝܼܫܹܝܠ ܓܝܼܘܲܪܓܝܼܣ. ܡ̣ܢ ܒܵܬܲܪ ܚܙܵܝܬܵܐ ܕܠܘܼܚܵܐ (ܒܲܠܚܘܿܕ݂ ܠܘܼܚܵܐ ܕܡܝܼܠܵܕ ܘܲܕܠܵܐ ܩܪܵܝܬܵܐ ܐܵܘ ܫܡܵܥܬܵܐ ܕܲܡܫܘܼܚܬ̣ܵܐ ܕܢܝܼܢܸܒ) ܡܝܼܫܹܝܠ ܢܩܝܼܫ ܠܹܗ ܠܚܲܕ݂ ܢܩܵܫܬܵܐ ܒܐܸܡܵܐ ܕܓܲܡܵܠܹ̈ܐ 13 (ܫܸܬ̣ܝܵܐ ܕܲܬܪܹܝܢ) ܘܡܘܿܫܡܸܥ ܠܹܗ ܠܗܵܕܹܐ ܢܩܵܫܬܵܐ ܠܢܝܼܢܘܿܣ ܬ̣ܵܒܸܬ ܦܲܬܝܼܩ. ܘܗܵܕܟ̣ܵܐ ܙܩܘܿܪܵܐ ܡܛܹܐ ܠܹܗ ܠܐܝܼܕ݂ܵܐ ܢܝܼܢܘܿܣ ܗ݁ܘ ܕܲܪܫܝܼܡ ܠܹܗ ܚܕ݂ܵܐ ܠܘܼܚܵܐ (ܕܘܼܠܵܐ ܕܲܬܪܹܝܢ) ܘܲܡܫܘܿܕܪܵܐ ܠܹܗ ܩܵܐ ܐܝܼܢܵܢܵܐ ܗܘܿܪܡܸܙܕ݇. ܒܲܚܙܵܝܬܵܐ ܕܗܵܕܹܐ ܠܘܼܚܵܐ، ܐܝܼܢܵܢܵܐ ܟܬ̣ܝܼܒ̣ ܠܵܗ݁ ܠܚܲܕܟܡܵܐ ܪܸ̈ܢܝܹܐ (ܫܸܬ̣ܝܵܐ ܬܠܝܼܬ̣ܵܝܵܐ) ܘܲܡܫܘܿܕܪܝܼ ܠܵܗ݁ ܩܵܐ ܫܪܵܪܵܐ ܐܲܒ̣ܪܵܗܵܡ. ܒܲܡܩܲܒܠܬܵܐ ܕܲܟܬ̣ܝܼܒ̣ܬܵܐ ܕܐܝܼܢܵܢܵܐ ܫܪܵܪܵܐ ܐܲܒ̣ܪܵܗܵܡ ܦܠܝܼܚ ܠܹܗ ܥܲܡ ܒܵܒܹܗ ܡܝܲܩܪܵܐ ܐܲܒ̣ܪܵܗܵܡ ܚܲܢܵܐ ܕܒܵܙ ܘܥܲܡ ܡܝܲܩܪܵܐ ܬܹܕܹܐ ܕܸܗܵܝܵܐ ܘܲܥܒ̣ܝܼܕ݂ ܠܲܝܗܝ ܚܕ݂ܵܐ ܙܡܵܪܬܵܐ ܕܝܼܠܵܗ݁ ܫܝܼܪܵܐ 14 ܕܐܲܒ̣ܪܵܗܵܡ ܚܲܢܵܐ ܕܒܵܙ (ܒܵܒܵܐ ܕܢܸܫܪܵܐ) ܘܪܸ̈ܟ̣ܢܹܐ، ܣܘܓ̣ܵܠܵܐ 15 ܘܦܘܼܠܵܓ̣ ܪܸ̈ܟ̣ܢܹܐ 16 ܒܝܲܕ݂ ܬܹܕܹܐ ܕܸܗܵܝܵܐ. ܘܗܵܕܟ̣ܵܐ ܒܗܵܕܹܐ ܙܡܵܪܬܵܐ ܕ’ܐܲܠܦܵܐ ܟܸܦܪܹ̈ܐ’ (ܐܵܘܟܹܝܬ̣ ܕܘܼܠܵܐ ܬܠܝܼܬ̣ܵܝܵܐ)، ܫܪܵܪܵܐ ܚܬ̣ܵܡܵܐ ܝܠܹܗ ܠܲܙܩܘܿܪܲܢ ܩܲܕ݂ܡܵܝܵܐ. ܔܔ

ܩܵܐ ܚܘܼܬ̣ܵܡܵܐ ܐ݇ܡܵܪܵܐ ܝܘܹܝܚ ܐܝܼܬ̣ ܠܲܢ ܣܲܒ̣ܪܵܐ ܕܒܸܕ ܡܲܚܒܝܼܬܘܿܢ ܠܐܵܗܵܐ ܙܩܘܿܪܲܢ ܡܠܲܚܡܵܐ ܕܡܲܩܪܘܿܒܹܐ ܝܘܹܝܚ ܩܵܐ ܝ݇ܬܵܘܟ̣ܘܿܢ ܐܲܝܟ̣ ܕܲܫܢܵܐ ܕܚܘܼܒܵܐ ܘܐܝܼܩܵܪܵܐ ܡ̣ܢ ܢܵܘܠܵܐ ܕܒܵܪܘܿܝܘܼܬܲܢ ܠܲܡܓܲܠܬ̣ܵܐ ܢܵܘܠܵܝܬܵܐ ܘܡ̣ܢ ܡܓܲܠܬ̣ܵܐ ܢܵܘܠܵܝܬܵܐ ܠܒܘܼܣܵܡܵܐ ܕܪ̈ܘܼܚܵܘܟ̣ܘܿܢ. ܔܔܩ


 ܢܝܼܢܸܒ ܠܵܡܲܣܘܼ-
ܡܲܨܚܵܢܵܐ ܟܠܵܢܵܝܵܐ
ܡܓܲܠܬ̣ܵܐ ܢܵܘܠܵܝܬܵܐ ܕܫܸܬ̣ܝܹ̈ܐ ܘܕܘܼܠܹ̈ܐ
ܝܲܪܚܵܐ ܒܪܝܼܟ̣ܵܐ ܕܢܝܼܣܵܢ 13 ܒܹܗ 6766


.1. Warp-and-Woof. 2. Web-base. 3. Editorship. 4. Of various fine arts. 5. Whisper. 6. Musician. 7. Arts. 8. Vision/Sight. 9. Creativity. 10. Fuses. 11. Weaver. 12. Weaving Loom. 13. Baghlama/Tanbura. 14. Lyrics. 15. Recording. 16. Musical Arrangements. 

Picture

ܫܸܬ̣ܝܵܐ ܩܲܕ݂ܡܵܝܵܐ


​ܢܝܼܢܸܒ ܠܵܡܲܣܘܼ ܟܬ̣ܝܼܒ̣ ܠܹܗ ܠܗܵܕܹܐ ܡܫܘܼܚܬ̣ܵܐ ܕܲܡܫܲܪܘܿܝܹܐ ܝܠܵܗ݁ ܠܐܵܗܵܐ ܡܸܢܝܵܢܵܐ ܩܲܕ݂ܡܵܝܵܐ ܕܲܡܓܲܠܬܲܢ ܥܲܠ ܐܲܣܝܼܪܘܼܬ̣ܵܐ ܕܬܲܪܬܹܝܢ ܥܠܲܝ̈ܡܵܬ̣ܵܐ ܐܵܬ̣ܘܿܪ̈ܵܝܵܬ̣ܵܐ: ܡܲܪܝܲܡ ܕܵܘܝܼܕ݂ ܛܲܠܝܵܐ ܘܟܵܪܘܿܠܵܝܢ ܡܘܼܫܹܐ ܘܲܥܠܲܝ̈ܡܵܬ̣ܵܐ ܕܵܣ̈ܢܵܝܵܬ̣ܵܐ ܕܲܕܒ̣ܝܼܩܹ̈ܐ  ܝܠܲܝܗܝ ܒܐܲܣܝܼܪܘܼܬ̣ܵܐ ܕܕܵܥܹܫ. ܡ̣ܢ ܝܵܘܡܵܐ ܕܲܟܬ̣ܝܼܒ̣ܵܐ ܠܹܗ ܗܵܕܹܐ ܡܫܘܼܚܬ݂ܵܐ ܡܵܚܘܿܪܵܗ݁ ܘܲܠܝܘܿܡ ܦܪܵܣܬܵܐ ܕܗܵܕܹܐ ܡܓܲܠܬܲܢ، ܡܲܪܝܲܡ ܡܚܘܿܪܸܪܬܵܐ ܝܠܵܗ݁ ܐܝܼܢܵܐ ܟܵܪܘܿܠܵܝܢ ܠܥܲܕ݂ ܒܐܲܣܝܼܪܘܼܬ̣ܵܐ ܝܠܵܗ݁


ܐܵܡܵܐ ܓܝܼ܍ 

​ܟܲܕ݂ ܡܒܲܘܘܿܒܹܐ
ܒܡܲܠܲܐܟ̣ܵܝܘ̣ܬ̣ܵܐ 
ܕܲܪܩܵܕ݂ܵܐ ܝܠܵܗ̇، ܒܒܵܒ̣ܵܬ̣ܵܘ̈ܟ̣ܘܿܢ 
ܡܲܠܲܐ̈ܟ̣ܵܝܵܬܵܐ
ܕܲܡܠܲܐܘܿܟܹܐ 1 ܝܠܲܝܗܝ ܐܸܓܪ̈ܵܬ̣ܵܐ
3 ܒܵܒ̣̈ܘܿܣܵܝܵܬ̣ܵܐ 2، ܡܛܘܿܪ̈ܛܸܫܹܐ 
ܒܝܲܕ݂ ܫܲܒ̣ܪܘܼܬ̣ܵܘܟ̣ܘܿܢ
ܕܣܝܼܒ̣ ܠܵܗ̇ ܒܫܲܒ̣ܪܘܼܬ̣ܵܗ̇، ܔ 
ܬܠܝܼܚ ܠܹܗ ܟܠܝܼ
ܘܲܕܥܝܼܪ ܠܹܗ 
ܕܬܵܠܹܚ ܡܸܢ̄ܕܪܹܫ̄، ܘܲܬܠܝܼܚ ܠܹܗ: ب 
ܐܲܝܟ̣ ܕܬܵܠܹܚ ܛܘܼܪܵܐ
ܘܲܡܕܘܿܩܕܸܩ ܠܕܲܩ̈ܕܩܵܬ̣ܵܐ
ܘܲܝ ܐܸܢ، ܕܲܩܕܲܩܬܵܐ ܡܫܲܢܝܵܐ ܗܘܵܬ ܛܘܼܪ̈ܵܢܹܐ
ܒܲܡܫܲܢܹܝܢ ܗܘܵܐ ܠܹܗ ܨܸܒ̣ܥܵܐ ܕܕܘܼܪܸܟ 4، ܘܫܵܕܹܝܢ 5 ܗܘܵܐ ܠܹܗ 
ܒܪܹܫ ܘܵܫܸܛܸܢ!  ܔ
ܘܥܲܒܕܸܠ ܥܲܙܝܼܙ ܒܪܹܫ ܡܘܿܣܟܘܿܒ̣،  ܔ
ܒܲܡܪܲܦܹܝܢ ܗܘܵܐ ܠܹܗ ܫܝܼܓܵܪ 
ܒܪܹܫ ܕܲܪܡܣܘܿܩ،  ܔ
  9 ܘܐܸܙܠܵܐ 6، ܩܵܕܘܿܡܵܐ 7، ܐ݇ܓܵܪܵܐ 8 ܘܡܲܬܝܼܢܵܐ
ܘܲܒܚܲܕ݂ ܒܵܙܵܐ ܕܩܵܛܝܼܢܵܐ
ܥܲܠ ܛܲܗܪܵܢ، ܥܲܢܩܵܪܵܐ، ܪܝܼܝܵܛ̣
10 ܘܐܸܡ̈ܘܵܬ̣ܵܐ ܡܚܲܝ̈ܕܵܬ̣ܵܐ
ܕܠܵܐ ܝܠܲܝܗܝ ܡܚܲܪܘܿܪܹܐ
  11 ܠܕܵܣ̈ܢܵܝܵܬ̣ܵܐ
ܘܬܲܪܬܹܝܢ ܐܵܬ̣ܘܿܪ̈ܵܝܵܬ̣ܵܐ، ܒܡܲܩܠܸܒܸܢ 
ܗܘܵܐ ܠܵܗ̇ ܒܪܝܼܬ̣ܵܐ
ܡ̣ܢ ܪܹܫܵܗ̇ ܠܐܸܫܬܵܗ̇
ܕܲܡܦܲܠܛܸܢ ܗܘܵܐ ܠܵܘܟ̣ܘܿܢ 
ܐܲܝܟ̣ ܘܲܪܕܵܐ
ܕܦܵܩܚܝܼ ܗܘܵܘ ܓܵܚܘܿܟ̈ܝܵܬ̣ܵܘܟ̣ܘܿܢ
ܩܕ݂ܵܡ ܒܸܟ̣ܝܵܐ ܕܝܸܡܵܬ̣ܵܘܟ̣ܘܿܢ
ܕܦܵܩܚܝܼ ܗܘܵܘ ܘܲܪ̈ܕܲܝܗܝ
 ܘܘܲܪ̈ܕܲܝ ܠܸܒܲܢ ܟܡܝܼܫܵܐ
ܘܕܲܡܢܲܝܣܸܢܸܚ 12 ܗܘܵܐ ܠܢܝܼܣܵܢܲܢ 
ܡܣܲܓܘܿܝܹܐ 13 ܠܣܘܿܓ̣ܝܵܬ̣̈ ܚܹܐܪܘܼܬ̣ܵܐ:  ܔ
ܐܵܡܵܐ ܓܝܼ، ܘܲܝ ܐܵܡܵܐ ܓܝܼ
ܕܵܘܨܵܐ 14، ܚܘܼܒܵܐ، ܘܲܫܠܵܡܵܐ
ܒܠܸܒܲܢ ܣܓܝܼ 15 ܠܲܝܗܝ ܘܒܸܕ ܣܵܓܝܼ
ܐܵܡܵܐ ܓܝܼ، ܘܲܝ ܐܵܡܵܐ ܓܝܼ
ܠܐܘܼܡܬܲܢ ܘܟܠܲܝܗܝ ܐܸܡ̈ܘܵܬ̣ܵܐ
ܐܵܡܵܐ ܓܝܼ ܘܲܝ ܐܵܡܵܐ ܓܝܼ


܍The first recorded term for Freedom from Sumerian and its literal meaning is: returning to mother. 1. This is from the verbal root ܠܐܲܟ̣ which means: he sent. This root, like a few other verbal roots in our language, does not conjugate, other than forming the noun  ܡܲܠܲܐܟ̣ܵܐ i.e. Angel. Although these verbal roots are not conjugated in Syriac, I feel we could enrich our language by conjugating these verbs rather than leaving them redundant. Therefore, I am conjugating this verb like any other middle weak verb and here I am using it to mean: 'that are sending'. 2. Your childish. 3. Scribble. 4. The name of a mountain peak in Jeelu, Hakkari. Supper d-Durek is the highest peak in Hakkari and second highest peak in Turkey.  5. Throw.
6. A mountain valley in Tur Abdin. 7. A mountain between Barwar and Ashitha. ​8. A mountain chain between the Nala valley and the Sapna valley. ​9. A mountain chain between Sapna valley and the Barwar valley. 10. United Nations. 11. Yizidi women. 12. This verb is coined by me, it is from the noun ܢܝܼܣܵܢ (April/Spring) and I am using it to mean: 'turning [something] into spring/April'.  13. To chant/sing an anthem. 14. Jubilate. ​15. Increased. 

Picture

ܕܘܼܠܵܐ ܩܲܕ݂ܡܵܝܵܐ


​ܡܝܼܠܵܕ ܝܘܿܚܲܢܵܢ ܚܲܕ݂ ܪܵܫܘܿܡܵܐ ܘܩܲܪܝܼܩܲܛܘܿܪܝܼܣܵܐ 1 ܐܵܬ̣ܘܿܪܵܝܵܐ ܝܠܹܗ  ܕܫܸܪܫܹܗ ܝܼܠܹܗ ܡ̣ܢ ܡܵܬ̣ܵܐ ܕܗܲܠܡܘܿܢ ܕܝܵܬܒ̣ܵܐ ܥܲܠ ܝܲܕ݂ ܚܵܒ̣ܘܿܪܵܐ ܘܗܵܫܵܐ ܚܵܝܹܐ ܒܐܲܬ̣ܪܵܐ ܕܢܘܿܪܘܲܝ. ܐܝܼܡܵܢ ܕܲܡܫܘܿܕܪܵܐ ܠܲܢ 

Picture

ܡܫܘܼܚܬ̣ܵܐ ܕܐܵܡܵܐ ܓܝܼ ܕܢܝܼܢܸܒ ܠܵܡܲܣܘܼ ܩܵܐ ܡܝܼܠܵܕ، ܡܝܼܠܵܕ ܪܫܝܼܡ ܠܹܗ ܠܗܵܕܹܐ ܠܘܼܚܵܐ  ܕܲܩܪܹܐ ܠܹܗ ܠܫܸܡܵܗ݁ ܟܵܪܘܿܠܵܝܢ، ܗ݁ܘ ܕܝܼܠܹܗ ܫܸܡܵܐ ܕܗ݁ܝ ܥܠܲܝܡܬܵܐ ܐܵܬ̣ܘܿܪܵܝܬܵܐ ܕܲܠܥܲܕ ܒܐܲܣܝܼܪܘܼܬ̣ܵܐ ܝܠܵܗ݁ ܠܘܵܬ̣ ܕܵܥܹܫ. ܔܔ


1. Cartoonist. 


ܟܵܪܘܿܠܵܝܢ

Picture
ܟܵܪܘܿܠܵܝܢ
Picture

ܫܸܬ̣ܝܵܐ ܬܪܲܝܵܢܵܐ


Picture

​ܡܝܼܫܹܝܠ ܓܝܼܘܲܪܓܝܼܣ ܚܲܕ݂ ܥܠܲܝܡܵܐ ܐܵܬ̣ܘܿܪܵܝܵܐ ܘܐܲܡܢܵܪܵܐ ܟܲܫܝܼܪܵܐ ܝܠܹܗ. ܡܝܼܫܹܝܠ ܢܵܩܹܫ ܥܲܠ ܐܸܡܵܐ ܕܓܲܡܵܠܹ̈ܐ ܘܢܵܩܹܫ ܠܵܗ݁ ܒܲܡܗܝܼܪܘܼܬ̣ܵܐ. ܫܸܪܫܹܗ ܝܼܠܹܗ ܡ̣ܢ ܡܵܬ̣ܵܐ ܕܗܲܠܡܘܿܢ ܕܚܵܒ̣ܘܿܪܵܐ ܘܗܵܫܵܐ ܚܵܝܹܐ ܒܐܘܼܚܕ݂ܵܢܹ̈ܐ ܡܚܲܝܕܹ̈ܐ ܕܐܵܡܹܝܪܝܼܟܵܐ. ܐܝܼܡܵܢ ܕܲܡܫܘܿܕ݂ܪܵܐ ܠܲܢ ܩܵܐ ܝ݇ܬܹܗ  ܠܘܼܚܵܐ ܕܲܪܫܝܼܡܵܐ ܠܹܗ ܡܝܼܠܵܕ ܗ݁ܘ ܢܩܝܼܫ ܠܹܗ ܠܐܲܢܲܝ ܪܸ̈ܟ̣ܢܹܐ ܘܲܩܪܹܐ ܠܹܗ ܫܸܡܵܐ ܕܗܵܕܹܐ ܢܩܲܫܬܹܗ ܚܲܫܵܐ ܕܒܹܝܬ̣ ܢܝܼܢܘܹܐ ܠܚܵܒ̣ܘܿܪܵܐ. ܔܔ


ܚܲܫܵܐ ܕܒܹܝܬ̣ ܢܝܼܢܘܹܐ ܠܚܵܒ̣ܘܿܪܵܐ

Picture

ܕܘܼܠܵܐ ܬܪܲܝܵܢܵܐ


​ܢܝܼܢܘܿܣ ܬ̣ܵܐܒܸܬ ܦܲܬܝܼܩ ܚܲܕ݂ ܥܠܲܝܡܵܐ ܐܵܬ̣ܘܿܪܵܝܵܐ ܝܠܹܗ ܕܐܝܼܬ̣ ܠܹܗ ܚܕ݂ܵܐ ܡܵܘܗܲܒ̣ܬܵܐ 1 ܕܲܪܫܵܡܵܐ ܘܲܓܠܵܦܵܐ 2. ܫܸܪܫܹܗ ܡ̣ܢ ܒܲܓ̣ܕܹܝܕܹܐ ܝܠܹܗ ܐܝܼܢܵܐ ܗܵܐ ܡ̣ܢ ܝܘܿܡ ܕܕܵܥܹܫ ܟܒ̣ܝܼܫ ܠܵܗ݁ ܠܲܡܕܝܼܢ݇ܬ̣ܵܐ ܕܢܝܼܢܘܹܐ ܘܡܸܫܛܵܚܵܗ݁، ܗ݁ܘ ܘܝܼܩܲܪܬܹܗ 3 ܥܡܵܪܵܐ ܝܠܲܝܗܝ ܒܥܹܝܢܟܵܒ̣ܵܐ. ܡ̣ܢ ܒܵܬܲܪ ܕܲܡܫܘܿܕܸܪ ܠܲܢ ܩܵܐ ܝ݇ܬܹܗ ܠܪܸ̈ܟ̣ܢܹܐ ܕܲܢܩܝܼܫܲܝܗܝ ܝܠܹܗ ܡܝܼܫܹܝܠ ܗ݁ܘ ܪܫܝܼܡ ܠܹܗ ܠܗܵܕܹܐ ܠܘܼܚܵܐ ܕܡܘܿܬܸܒ̣ ܠܹܗ ܫܸܡܵܗ݁ ܢܝܼܢܘܹܐ ܘܢܝܼܢܘܵܝܹ̈ܐ. ܔܔ
ܐܝܼܬ̣ ܠܲܢ ܣܲܒ̣ܪܵܐ ܕܐܵܗܵܐ ܥܠܲܝܡܵܐ ܟܲܫܝܼܪܵܐ ܘܲܙܪܝܼܙܵܐ ܒܸܕ ܓܵܪܹܫ ܠܙܘܼܗܵܪܵܐ ܕܫܘܼܬܐܵܣܲܝ̈ܢ ܕܣܵܢܕܝܼ ܠܹܗ ܡܵܡܘܿܢܵܐܝܼܬ̣ 4 ܘܣܘܼܟܵܠܵܐܝܼܬ̣ 5 ܕܡܵܨܹܐ ܕܲܡܫܲܘܫܸܛ ܠܟܲܟܪܹ̈ܗ 6 ܝܘܼܠܦܵܢܵܐܝܼܬ̣. ܔܔ

Picture

​1. Gift/Talent. 2. Sculpturing. 3. Family. 4. Financially. 5. Morally. 6. His talents/his gifts. 


ܢܝܼܢܘܹܐ ܘܢܝܼܢܘܵܝܹ̈ܐ

Picture
ܢܝܼܢܘܹܐ ܘܢܝܼܢܘܵܝܹ̈ܐ
Picture

ܫܸܬ̣ܝܵܐ ܬܠܝܼܬ̣ܵܝܵܐ


Picture

​ܐܝܼܢܵܢܵܐ ܗܘܿܪܡܸܙܕ݇ ܚܕ݂ܵܐ ܥܠܲܝܡܬܵܐ ܐܵܬ̣ܘܿܪܵܝܬܵܐ ܝܠܵܗ݁ ܕܐܝܼܬ̣ ܠܵܗ݁ ܚܲܕ݂ ܩܲܢܝܵܐ ܚܲܪܝܼܦܵܐ ܘܡܘܿܚܸܪܦܵܐ ܒܲܕ݂ܡܘܼܬ̣ ܚܲܪܝܼܦܘܼܬ̣ ܗܵܘܢܵܗ݁ ܕܪܵܢܹܐ 1 ܘܡܲܪܢܹܐ 2 ܒܨܸܒ̈ܘܵܬ̣ܵܐ ܕܢܸܫܵܝܘܼܬ̣ܵܐ 3  ܒܲܝܢܵܬ̣ ܥܠܲܝܡܘܼܬܲܢ. ܫܸܪܫܵܗ݁ ܡ̣ܢ ܘܲܠܛܘܼܒ̣ ܘܬܸܠ ܗܘܿܪܡܸܙܕ݇ ܝܠܹܗ، ܬܲܪܬܹܝܢ ܡܵܬ̣̈ܘܵܬ̣ܵܐ ܐܵܬ̣ܘܿܪ̈ܵܝܵܬ̣ܵܐ ܕܝܵܬܒ̣ܝܼ ܥܲܠ ܝܲܕ݂ ܚܵܒ̣ܘܿܪܵܐ. ܐܝܼܢܵܢܵܐ ܚܝܵܝܵܐ ܝܠܵܗ݁ ܗܵܫܵܐ ܒܛܘܼܪ ܠܸܒ̣ܢܵܢ ܐܲܝܟܵܐ ܕܲܣܒܵܪܵܐ ܝܠܵܗ݁ ܕܗܵܘܝܼ ܘܲܪ̈ܵܩܵܗ݁ ܘܡܵܛܝܵܐ ܠܝܼܩܲܪܬܵܗ݁ ܕܲܚܝܵܝܵܐ ܝܠܵܗ݁ ܒܐܲܬ̣ܪܵܐ ܕܓܲܪܡܲܢ.  ܔܔ

ܐܝܼܡܵܢ ܕܲܡܛܹܐ ܠܵܗ݁ ܠܐܝܼܕܲܢ ܠܘܼܚܵܐ ܕܲܪܫܝܼܡܵܐ ܝܠܹܗ ܢܝܼܢܘܿܣ ܡܫܘܿܕ݂ܪܵܐ ܠܲܢ ܩܵܐ ܐܝܼܢܵܢܵܐ ܘܐܲܝܟ̣ ܕܝܼܠܵܗ݁ ܡܲܚܙܘܿܝܹܐ ܕܐܝܼܢܵܢܵܐ ܟܪܝܼܗ 4 ܠܹܗ ܠܵܗ݁ ܟܲܕ݂ ܚܙܹܐ ܠܵܗ݁ ܠܐܘܼܡܬ̣ܵܐ ܛܪܝܼܕ݂ܬܵܐ ܡ̣ܢ ܢܝܼܢܘܵܗ݁ ܘܲܚܝܵܝܵܐ ܒܝܵܪ̈ܝܼܥܵܬ̣ܵܐ 5 ܘܗܵܕܟ̣ܵܐ ܟܬ̣ܝܼܒ̣ ܠܵܗ݁ ܠܐܲܢܲܝ ܪܸ̈ܢܝܹܐ ܡܵܪ̈ܘܿܕܹܐ 6 ܕܡܘܿܬܸܒ̣ ܠܵܗ݁ ܫܸܡܲܝܗܝ: ܫܘܼܒܙܵܙܵܐ 7 ܕܠܵܐ ܫܘܼܘܙܵܒ̣ܵܐ 8. ܔܔ


+ܫܘܼܒܙܵܙܵܐ ܕܠܵܐ ܫܘܼܘܙܵܒ̣ܵܐ

​ܒܢܝܼ ܠܵܗ݁، ܒܢܝܼ ܠܵܗ݁ ܕܪܵܝܡܵܐ
ܠܥܸܠ.. ܠܥܸܠ..  ܔ
ܡܲܪܸܡ ܠܵܗ݁، ܟܒܲܪ ܕܢܵܚܬܝܼ ܒܪܹܫܲܢ ܒܘܼܪ̈ܟܵܬ̣ܵܐ ܕܲܫܡܲܝܵܐ..  ܔ
 10 ܡܲܪܸܡ ܠܵܗ݁ ܩܲܠܝܼܠ ܐ݇ܚܪܹܢܵܐ.. ܟܒܲܪ ܕܩܲܫܝܼܫܘܼܬܹܗ 9 ܝܠܵܗ݁ ܥܸܠܵܐ ܕܲܓ݁ܝܼܓ̣ܘܼܬܹܗ
ܡܵܘܬܸܒ̣ ܠܹܗ ܫܵܡܘܿܢܘܼܟ̣ 11، ܐܸܢ ܚܘܵܪܵܐ ܕܗܵܘܹܐ ܐܵܘ ܐ݇ܟܘܿܡܵܐ، ܕܡܲܪܡܸܬ݁ ܠܹܗ ܒܸܢܝܵܢܵܐ ܡܩܘܿܕܫܵܐ..  ܔ
​ܗ݁ܘ ܒܸܕ ܡܲܬܒܸܬ݁ ܒܹܗ ܚܲܕ݂ ܫܵܡܘܿܢܵܐ ܐ݇ܚܪܹܢܵܐ ܠܟܠ ܨܠܘܿܬ̣ܵܐ ܕܒܸܕ ܡܨܲܠܹܝܬ݁ ܠܵܗ݁
ܫܵܡܘܿܢܵܐ ܠܲܚܘܼܫܒܵܢܵܐ ܕܐܲܠܵܗܵܐ ܡܥܲܪܦܵܢܵܐ، ܐܵܘ ܠܚܘܼܫܒܵܢܵܐ ܕܩܲܫܝܼܫܵܐ!  ܔ
ܡܲܣܒܸܥ ܠܝܲܥܢܘܼܬܹܗ 12 ܒܲܚܕ݂ܵܐ ܪܵܕ݂ܝܼܬ̣ܵܐ 13، ܒܚܲܕ݂ ܒܲܝܬܵܐ ܐܵܘ ܒܚܲܕ݂ ܓܲܙܵܐ ܐܲܪܥܵܢܵܝܵܐ 14 ܐ݇ܚܪܹܢܵܐ! ܔ
ܘܗ݁ ܕܡܲܠܟܘܼܬܹܗ ܠܵܐ ܝܠܵܗ݁ ܡ̣ܢ ܕܐܲܝܵܐ ܒܪܝܼܬ̣ܵܐ، ܒܵܠܹܥ ܠܵܗ݁ ܒܪܝܼܬ̣ܵܐ ܒܹܝܬ̣ ܦܲܟܲܝ̈ ܝܲܥܢܘܼܬܹܗ 15، ܔ   
ܘܡܲܩܢܸܥ ܠܘܼܟ̣ ܕܐܝܼܬ̣ ܡܲܠܟܘܼܬ̣ܵܐ ܢܛܵܪܘܼܟ̣ ܒܲܫܡܲܝܵܐ ܡ̣ܢ ܒܵܬܲܪ ܗ݁ܘ ܢܵܘܡܵܐ ܐܲܡܝܼܢܵܐ .. 16  ܔ
ܘܡܲܥܒܸܪ ܠܬܘܼܢܵܒܹܗ 17 ܒܪܹܫܘܼܟ̣ ܒܲܚܕ݂ܵܐ ܟܵܪܘܿܙܘܼܬ̣ܵܐ ܐܵܘ ܚܲܕ݂ ܗܸܪܓܵܐ ܬܵܘܕܝܼܬ̣ܵܢܵܝܵܐ 18،  ܔ
ܕܓܵܢܹܒ̣ ܠܟܠ ܕܐܝܼܬ̣ ܠܘܼܟ̣ ܘܠܲܝܬ݁ ܠܘܼܟ̣..  ܔ
ܦܵܩܹܕ݂ ܠܘܼܟ̣: ܘܵܠܹܐ ܕܲܡܩܲܒܠܸܬ݁ ܫܘܼܢܵܩܹ̈ܐ 19، ܘܵܠܹܐ ܕܲܡܩܲܒܠܸܬ݁ ܫܘܼܢܵܩܹ̈ܐ.. ܒܫܘܼܢܵܩܹ̈ܐ ܐܝܼܬ̣ ܙܲܕܝܼܩܘܼܬ̣ܵܐ ܘܐܵܦ ܗܲܝܡܵܢܘܼܬ̣ܵܐ. ܔ
ܘܵܝܹ̈ܐ ܠܘܼܟ̣ ܐܸܢ ܡܒܲܩܪܸܬ݁ ܠܹܗ: ”ܘܐܲܢ݇ܬ݁ ܠܡܵܐ ܠܵܐ ܡܩܲܒܠܸܬ݁ ܫܘܼܢܵܩܹ̈ܐ”؟ ܔ
ܘܗܵܐ ܦܘܼܢܵܝܹܗ ܡܛܲܝܒ̣ܵܐ 20 ܝܠܹܗ ܘܲܡܩܘܿܕܸܫ ܒܲܚܕ݂ܵܐ ܨܘܼܪܲܬ̣ ܟܬܲܒ̣ 21: ”ܫܡܘܿܥܘܿܢ ܠܡܵܐ ܕܐܵܡܪܝܼ ܘܠܵܐ ܠܡܵܐ ܕܥܵܒ̣ܕܝܼ. ܛܔ
ܣܵܦܹܩ 22 ܠܵܘܟ̣ܘܿܢ! ܣܵܦܹܩ!.. ܒܚܘܼܒܵܐ ܕܫܲܒ̣ܪܘܼܬ̣ܵܐ ܘܲܪܒܝܼܥܵܐ.. 23 ܔ
ܗܵܠ ܐܝܼܡܵܢ ܒܝܵܬܒ̣ܝܼ ܢܵܣܒܲܝ̈ ܒܐܲܦܹ̈ܐ ܥܲܠ ܚܲܨܵܘܟ̣ܘܿܢ؟  ܔ
ܐܲܦܸܣܩܘܿܦܵܐ ܐܵܘ ܩܲܫܝܼܫܵܐ ܐܵܘ ܡܫܲܡܫܵܢܵܐ..  ܔ
ܗܵܠ ܐܝܼܡܵܢ ܒܗܵܘܝܼܬܘܿܢ ܫܒ̣ܵܝܵܐ 24 ܠܥܘܼܡܨܵܐ 25 ܕܠܲܚܡܵܐ ܡ̣ܢ ܦܘܿܡ ܙܲܪ̈ܥܵܘܟ̣ܘܿܢ ܕܲܡܥܲܪܦܝܼ ܠܹܗ ܐܵܢܝܼ ܒܲܡܣܵܐܢܹ̈ܐ 26 ܕܪܵܦܨܝܼ ܠܵܘܟ̣ܘܿܢ ܐܸܒܲܝܗܝ؟  ܔ
ܣܵܦܹܩ ܠܵܘܟ̣ܘܿܢ! ܐܸܢ ܐ݇ܡܝܼܪ ܠܹܗ ܚܲܕ݂ ܙܹܐܦܵܢܵܐ: ܚܘܼܪ ܬܲܡܵܢ ܒܹܝܬ̣ ܨܠܝܼܒ̣ܵܐ ܠܲܨܠܝܼܒ̣ܵܐ, ܙ݇ܦܸܠܵܢ ܩܲܕܝܼܫܵܐ ܡܲܚܘܘܿܝܹܐ ܝܠܹܗ ܝܵܬܹܗ”  ܔ
ܦܸܣܩܵܐ ܒܸܕ ܨܵܪܹܚ ܒܕܘܼܡܵܪܵܐ: ”ܫܘܼܒ̣ܚܵܐ ܠܫܸܡܵܐ ܕܡܵܪܝܵܐ”!  ܔ
ܘܗܵܕܟ̣ܵܐ ܫܵܦܠܝܼ ܟܠܲܝܗܝ ܪ̈ܓ̣ܫܹܐ ܘܩܲܕ݂ܡܵܐܝܼܬ̣ ܡܠܝܼܠܘܼܬ̣ܵܐ..  ܔ
ܣܵܦܹܩ ܠܵܘܟ̣ܘܿܢ ܒܘܼܪܘܼܬ̣ܵܐ 27 ܕܡܲܣܡܸܝܵܐ ܠܠܸܒܵܐ ܘܗܵܘܢܵܐ ܘܥܲܝܢܹ̈ܐ!  ܔ 
ܔ
ܡܣܲܪܓܘܿܢ 28 ܠܣܲܪܓܵܘܟ̣ܘܿܢ ܥܲܠ ܚܲܨܵܐ ܕܠܵܡܲܣܘܼ ܘܲܣܛܝܼܡܘܿܢ
ܪܸܚܩܵܐ ܡ̣ܢ ܠܐܲܟ̣ܵܐ، ܡ̣ܢ ܕܐܲܝܵܐ ܕܘܼܟܬ̣ܵܐ ܚܸܫܟܵܢܬܵܐ
ܚܒܘܿܩܘܿܢ ܠܚܹܐܪܘܼܬ̣ܵܐ،  ܔ
ܘܲܒܚܲܪܬ̣ܵܐ ܫܪܝܼܡܘܿܢ ܒܲܚܕ݂ܵܐ ܓܲܢܬ̣ܵܐ ܕܘܲܪ̈ܕܵܗ݁ ܪܸܢܝܵܐ ܝܠܲܝܗܝ ܘܲܡܠܝܼܠܘܼܬ̣ܵܐ 29. ܔ



+ Exploitation without Emancipation: ܫܘܼܒܙܵܙܵܐ is neologism coined by our team which is in the process of establishing a language academy. The neologism was coined from the verbal root of ܒܲܙ and according to the ܫܲܥܒܸܕ݂/ܫܲܦܥܸܠ paradigm. 1. Thinks. 2. Causes others to think. 3. Feminist Affairs/Topics. 4. Caused her pain. 5. Tents. 6. Rebellious. 7. This neologism was coined by Malphono Yusuf Beğtaş and Nineb Lamassu to mean: 'Exploitation'. It is the ܫܲܥܒܸܕ݂/ܫܲܦܥܸܠ form of ܒܲܙ.h8. Emancipation. 9.  His advanced age. 10. Deafness. 11. Your coin. 12. Greed. 13. Car. 14. Earthly treasure. 15. Between the jaws of his greed. 16. Eternal sleep. 17. Anaesthesia. 18.  Religious lesson. 19. Torment. 20. Ready. 21. Biblical verse. 22. Enough. 23. Spring. 24. Steal. 25. A morsel of bread. 26. A pair of shoes. 27. Ignorance. 28. Saddle, as in a verb. 29. Logic.

Picture

ܕܘܼܠܵܐ ܬܠܝܼܬ̣ܵܝܵܐ

ܫܪܵܪܵܐ ܐܲܒ̣ܪܵܗܵܡ ܚܲܕ݂ ܥܠܲܝܡܵܐ ܐܵܬ̣ܘܿܪܵܝܵܐ ܟܲܫܝܼܪܵܐ ܝܠܹܗ ܘܚܲܕ݂ ܡ̣ܢ ܙܲܡܵܪ̈ܲܝܢ ܥܠܲܝܡܹ̈ܐ  ܕܐܝܼܬ̣ ܠܹܗ ܚܲܕ݂ ܩܵܠܵܐ ܛܘܼܪܵܝܵܐ ܕܦܵܐܹܚ ܠܲܚܕ݂ܵܐ ܪܘܼܚܵܐ ܡܲܕܢܚܵܝܬܵܐ ܐܲܝܟ̣ ܥܸܛܪܵܐ ܕܦܵܐܹܚ ܡ̣ܢ ܡܸܕܪܵܐ 1 ܡ̣ܢ ܒܵܬܲܪ ܪ̈ܣܝܼܣܹܐ ܢܝܼܣܵܢܵܝܹ̈ܐ ܒܡܵܬ̣̈ܘܵܬ̣ܲܢ. ܗܵܫܵܐ ܚܝܵܝܵܐ ܝܠܹܗ ܒܥܲܡܵܐܢ ܥܲܡ ܝܼܩܲܪܬܹܗ ܐܲܝܟܵܐ ܢܛܵܪܵܐ ܝܠܲܝܗܝ ܕܗܵܘܝܼ ܘܲܪ̈ܩܲܝܗܝ ܕܡܵܛܝܼ ܠܐܘܼܚܕܵܢܹ̈ܐ ܡܚܲܝܕܹ̈ܐ ܕܐܲܡܹܝܪܝܼܟܵܐ. ܔܔ
ܐܝܼܡܵܢ ܕܲܡܫܘܿܕܸܪ ܠܲܢ  ’ܫܘܼܒܙܵܙܵܐ ܕܠܵܐ ܫܘܼܘܙܵܒ̣ܵܐ’ ܕܐܝܼܢܵܢܵܐ ܩܵܐ ܝ݇ܬܹܗ، ܫܪܵܪܵܐ ܦܠܝܼܚ 

Picture

ܠܹܗ ܥܲܡ ܒܵܒܹܗ: ܡܝܲܩܪܵܐ ܐܲܒ̣ܪܵܗܵܡ ܚܲܢܵܐ ܕܒܵܙ (ܗ݁ܘ ܕܲܝܕ݂ܝܼܥ ܐܲܝܟ̣ ܒܵܒܵܐ ܕܢܸܫܪܵܐ) ܘܥܲܡ ܡܝܲܩܪܵܐ ܬܹܕܹܐ ܕܸܗܵܝܵܐ ܘܐܵܢܝܼ ܥܒ̣ܝܼܕ݂ ܠܲܝܗܝ ܠܗܵܕܹܐ ܙܡܵܪܬܵܐ ܕܡܘܿܬܸܒ̣ ܠܲܝܗܝ ܫܸܡܵܐ ’ܐܲܠܦܵܐ  ܟܸܦܪܹ̈ܐ’ ܘܗ݁ܝ ܕܝܼܠܵܗ݁ ܡ̣ܢ ܫܝܼܪܹ̈ܐ 2 ܕܐܲܒ̣ܪܵܗܵܡ ܚܲܢܵܐ ܕܒܵܙ (ܒܵܒܵܐ ܕܢܸܫܪܵܐ) ܘܪܸ̈ܟ̣ܢܹܐ 3، ܣܘܼܓ̣ܵܠܵܐ 4 ܘܲܣܕ݂ܝܼܪܘܼܬ̣ ܪܸ̈ܟ̣ܢܹܐ 5 ܒܝܲܕ݂ ܬܹܕܹܐ ܕܸܗܵܝܵܐ. ܔܔ


1. Earth, soil. 2. Lyrics: from the verbal root ܫܵܪ, and from ܫܵܪ we have ܫܝܼܪܵܐ and ܫܝܼܪܹ̈ܐ just as we have ܫܝܪܲܬ̣ ܫܝܼܪܝܼܢ. Some spell this as ܫܹܥܪܹ̈ܐ and some avoid using this noun since they think it originates from the Arabic شعر; however, it is clear that this is from the Akkadian: Šēru. The Chief editor of Warp-and-Woof (ܫܸܬ̣ܝܹ̈ܐ ܘܕܘܼ̈ܠܹܐ) suggests we used ܫܝܼܪܵܐ for lyrics (singular) and ܫܝܼܪܹ̈ܐ for lyrics (plural), and ܡܲܚܪܵܐ and/or ܡܫܘܼܚܬ̣ܵܐ for a poem. Thus we will differentiate between Lyrics (ܫܝܼܪܹ̈ܐ) and Poems (ܡܲܚܪܹ̈ܐ ܘܡܘܼܫ̈ܚܵܬ̣ܵܐ); and Lyricist (ܫܲܝܵܪܵܐ) and Poet (ܡܵܚܘܿܪܵܐ ܐܵܘ ܡܵܫܘܿܚܵܐ).h 3. Melody. 4. Recording. 5. Musical arrangements. 

ܐܲܠܦܵܐ ܟܸܦܪܹ̈ܐ

Picture

ܠܐܲܟ̣ܵܐ ܫܠܝܼܡ ܠܹܗ ܙܩܘܿܪܲܢ ܡܠܲܚܡܵܐ ܘܲܫܒ̣ܝܼܩ ܠܲܢ ܢܵܘܠܵܐ ܠܚܲܘܵܟܹ̈ܐ ܐ݇ܚܪܹ̈ܢܹܐ ܕܐܵܬ̣ܝܼ ܘܲܒܫܸܬ̣ܝܲܝܗ̈ܝ ܘܕܘܼܠܲܝܗ̈ܝ ܙܵܩܪܝܼ ܠܲܢ ܚܲܕ݂ ܙܩܘܿܪܵܐ ܚܲܕܬ̣ܵܐ. ܔܔ


Recent Publications

Picture
Nineb Lamassu's new poetry collection, 'Stolen Title'. Click here to learn more about this collection and to purchase your copy now. 
Picture
The exciting new literary journal, Ashlay Nissaba. Click here to learn more about this journal and to purchase your copy now. 
0 Comments

    You may need to download these fonts to view this block.

    ܐܲܫ̈ܠܲܝ ܢܸܨܵܒܵܐ

    Picture

    ܙܒ̣ܘܿܢܘܿܢ ܘܲܦܩܘܿܕ݂ܘܿܢ ܠܗܵܕܹܐ ܡܓܲܠܬ̣ܵܐ ܡ̣ܢ ܠܐܲܟ̣ܵܐ

      ܡܵܘܕܝܼ ܝܠܹܗ ܪܸܢܝܵܘܟ̣ܘܿܢ

    Submit

    ܥܸܠܵܘܲܝ ܚܠܝܼܨܵܐ

    Picture

    ܙܒ̣ܘܿܢܘܿܢ ܘܲܦܩܘܿܕ݂ܘܿܢ ܠܐܵܗܵܐ ܟܬ̣ܵܒ̣ܵܐ ܡ̣ܢ ܠܐܲܟ̣ܵܐ

      ܟܬ̣ܘܿܒ̣ܘܿܢ ܩܵܐ ܝ݇ܬܲܢ

    Submit

Excelling in Syriac and Modern Assyrian publishing 


Hours

M-F: 9am - 5pm
​GMT

U.K. Telephone

+44 (0) 1223 853040

U.S. Telephone

+1 773-377-6343

Email

[email protected]
  • Home
  • Books
  • Journals
  • Editorial Board
  • Sarqaya
  • Store
  • News
  • ܫܸܬ̣ܝܹ̈ܐ ܘܕܘܼ̈ܠܹܐ
  • Authors
  • Contact Us